PAHLAWAN KANDANGAN RAYA

Tutupi kajang kayu bapangkih
Andak bungkalang dihiga lawang
Asal Lukloa si naga putih
Tulak manyarang si naga habang

Baca talakin di pakuburan
Dimakani katupat bakuah
Antaluddin jagau Kandangan
Dalas pang hangit kada manyarah

Gantung caramin dianjung kiwa
Ampar di ambin tikar rumbia
Antaluddin gagah urangnya
Nang kita warisi samangat juangnya

Buah pamparawin buah pampakin
Duduk bakadap makan durian
Raksa Yuda wan Antaluddin
Wan Antasari badangsanakan

Kilam kilaman tanah rantauan
Tadangar urkis hati mangganang
Bukhari Kandangan tahan tungkihan
Kontroler Domes sidin cancang

Pina musti sayang wan banih
Kanapa lupa wan pitua nini
Pina musti sayang wan mirah putih
Kanapa lupa wan Hasan Basri

Pandai wasi manampa waja
Ulah sanjata gasan dibagi
Hasan Basri Gubernur Tantara
Pahlawan Nasional nang kita sayangi

Apam batil bagula habang
Wadai kukulih jual diwarung
Hasan Basri tokoh pajuang
Urangnya alim kahada sumbung

Pucuk kalakai gasan lalapan
Masak bajarang wan kacang panjang
Disa Mandapai disa parjuangan
Wadahnya urang tulak manyarang

Karung banih angkut kahulu
Lanting ditanjak wan bilah buluh
Dikampung Ni’ih badiri tugu
Bukti parjuangan malawan musuh

Ka Loksado umpat mambuntel
Lading balati dipinggangnya
Tujuh belas mai proklamasi kalsel
Kita warisi samangat juangnya

Amun dipuai sisarang wanyi
Madunya likat liwar nyamannya
Tujuh belas mai proklamasi ALRI
Baisi samangat pahlawan ampat lima

*Sumber : Pantun Pantun Babahasa Banjar